Ɛ ‑seie 'ʋn 'de 'ma "cɛi o nʋʋ 'kwa
7
Dafi 'a kpledʋ ɔ blea ɔ 'da Tʋ "bo 'de Kusɩ ‑nɩa Bɛnsamɛ 'ɛ "ji 'a ‑tɩ' 'ʋn ɛ.
2 Tʋ "bo, 'ma Kea 'de ɛ 'ʋn 'bo 'ma paa 'kwla;
ɛ 'pʋʋ 'ʋn 'de 'ma 'kle ‑tu" nyʋ 'kwa; ɛ ‑seie 'ʋn.
3 Ɛ e kan' nɩ ‑wɛe ʋʋ je 'mii 'fae‑ ka ‑plaa a 'faea nyʋ i
'de nyɔ jrɔ' seɛ 'bɛɛ ɔ 'jea nyʋ 'de ɛ "wɛin ‑sa a.
4 Tʋ "bo, 'ma Kea, ‑bo 'ɩn nʋ ɛɛ' dɛ tu,
'de ‑bo nyʋ "jru i dia' nɩ 'ma kplɩn 'ʋn ɛ,
5 ‑Bo 'ɩn nʋ nyʋ ‑ke 'ʋn dbɛɛa ‑cnun" un "jrii,
‑bo ‑tɩ' se 'e nɩ ‑wɛe 'ɩn 'je 'ma tʋnyʋ dɛ 'kwa ‑sa a,
6 ‑Mɛ 'ma tʋnyɔ ple 'ʋn kɩɩn ɔ 'je 'ʋn kpʋn,
ɔ 'je 'ʋn 'kwa nynii‑,
ɔ 'je 'ma 'beɔdɛ i ''kla 'de "puue' 'di ‑Te' ‑kwlʋ.
7 Tʋ "bo, ɛ sɔn 'ʋn ɛ ‑sa 'ma tʋnyʋ ‑je 'kwa,
ɛ sɔn 'ʋn ɛ ji 'ʋn o, ɛ 'je 'ma ‑tɩ' "i ‑klɛɛ.
8 ‑Bo 'blʋa ‑wee'‑ 'kɩɩɛn "jrui 'de ɛ 'dei mɔ 'de ɛ
ɛɛ' Tʋ"bodɛ nɩ ʋʋ ‑wee'‑ "jru kpɔ'.
9 'Oo Tʋ "bo, ɛmɛ ‑ɛɛ ‑jea 'blʋɩ ‑wee' 'a 'pee ɛ,
ɛ ‑sa 'ma ‑tɩ' 'ʋn ka ‑cɔɔn'‑ ka‑ ka 'ɩn sea dɛjrɛ' nʋ ɛ.
10 Nyʋ ‑nynia 'diwɔn ʋʋa' 'srɛ ʋʋa nʋa, ɛ nynaa ‑mi i,
ɛ kuu "isrɛi 'a dɩ i, ɛmɛ ‑juua dɩ ‑nɩa 'de pɛe o ke
dɩ ‑nɩa 'de 'mɩ ‑sɔn' ‑ke ɛ, "isrɛ Kea.
11 'Ma "i kaandɛ mɛ ‑nɩ Kea
ɛmɛ ‑ɛɛ ‑pʋʋ' nyʋ ‑ʋʋa pɛe "srɛai ɛ.
12 Kea nɩɛ 'peejei ‑srɛai" ‑o,
ɛ 'bɛɛ' ɛ 'je 'cɛn 'kpa 'de nɔ" ‑wee'‑ 'di.
13 ‑Bo dɛsaʋnʋɩ se ɔɔ' ‑kɔ "i juuo ɛ,
Kea a poɛ ɛɛ' ‑placnɛ "i,
ɛɛ ‑tuɛ" ɛɛ' plʋ mɛ" ‑wɛe ɛ ‑teɛ' ja.
14 'De ɔ o 'bomɔ ɛ too "ku 'dba dɩ‑,
ɔmɔ ‑ɔɔ ‑tɩ' 'ʋn ɛ nʋ 'sɩn ‑blea nɛ "mlɛi ɛ.
15 Ao ‑gbʋn, dɛsaʋnʋɩ nɩɛ tɔ' saʋn i naa',
ɛɛ' 'sʋ ‑ji" ɔɔ' "kwli, 'kaa dɛ 'dɔe se 'de ɔ 'ʋn 'wlʋ i.
16 Ɔ "bluɛ "bie ‑gbau", ‑wɛe ɔɔ' ‑cɛ" 'kpa blu 'de ɛ 'di.
17 Ɔɔ' dɛsaʋn a muɛ ɔɔ' ‑cɛ" "jru ‑craa',
‑wɛe ɔɔ' 'diwɔnynia' 'je ɔɔ' ‑cɛ" "jru bluua‑.
18 'Ma muɛ Tʋ "bo 'a 'nynɩ "i 'bɛɛa' 'de ɛɛ' "isrɛ ‑tɩ 'ʋn,
'ma muɛ blea' 'ɩn 'je Kea ‑nɩa 'e dɩ ‑wee'‑ "klein "jrukpɔ' 'ɔ 'nynɩ "i 'bɛɛ‑.